Поставена изложба на делата создадени на годинашната 61. Меѓународна Струмичка ликовна колонија

Традиционално на Денот на ослободувањето на Струмица, 11-ти Септември вечерва во фоајето на Центарот за култура „Антон Панов“ беше отворена Изложба на 35-те ликовни дела од годинашната 61. Меѓународна Струмичка ликовна колонија која се одржа во Струмица од 5 до 15 август.

Во овие десет дена на ликовната колонија работеа 17 ликовни уметници од Полска, Србија, Бугарија и Македонија кои ги создадоа 35-те нови слики, а твореа во различни ликовни дисциплини, од кои и два мозаика на Ѓорги Томовски и Наташа Дејановиќ, како учесници на Работилницата за современ мозаик, која по 32-ри пат е дел од Меѓународната Струмичка ликовна колонија, а ја востанови познатиот мозаичар, Акедемик Газанфер Бајрам.

Изложбата во име на градоначалникот Костадин Костадинов ја отвори Ице Беличев, член на Советот на општина Струмица кој кажа дека со новите дела богатиот фонд на колонијата ја достигна импозантната бројка од околу 2850 дела.

„Тоа е едно непроценливо богатство на кое сите струмичани треба да бидеме горди, но и сета македонска културна јавност. За таквиот нов влог во ликовната ризница на колонијата им честитам на сите ликовни уметници кои беа дел од овогодишната колонија, како и на луѓето од секторот за Ликовно-галериска дејност при НУЦК „Антон Панов“ кои ја имаа улогата на организатори на колонијата“ – кажа Беличев.

ФОТОГАЛЕРИЈА