Полициски службеници спроведуваат превентивна активност под мотото „Носи кацига – вози безбедно“

На повеќе локации на подрачјето на Струмица полициски службеници од Отсекот за превенција и Полициската станица за безбедност на сообраќајот на патиштата Струмица спроведуваат превентивна активност под мотото „Носи кацига – вози безбедно“. Оваа активност се реализира во соработка со Републичкиот совет за безбедност на патниот сообраќај и Мото асоцијација на Македонија на МК Клубови.

Преку делење на летоци со едукативна содржина полициските службеници и советниците од РСБСП ги потсетуваат возачите на мотори, мопеди, но и на возачите на електрични тротинети на кои им е обврска да носат заштитни средства, како што е кацигата, со што значително ќе ја зголемат својата безбедност, односно носењето кацига може да го спаси нивниот живот.

„Во првите 6 месеци од минатата 2023 година на подрачјето на СВР Струмица имавме три жртви во сообраќајни несреќи кои управувале или се превезувале на мотор, а во шесте месеци од 2024 година не е случена сообраќајна несреќа со загинат мотоциклист, што ни дава за право да кажеме дека превентивните активности кои се спроведуваат влијаат на подигање на свеста кај оваа категорија учесници во сообраќајот“ – кажа Александра Трајанова, портпарол на СВР Струмица.

Таа потенцира дека покрај превентивните акции, на подрачјето на СВР Струмица продолжуваат и засилените акциски контроли за санкционирање на оние учесници во сообраќајот што не ги почитуваат правилата. Ова се однесува и на возачите на мотори, мопеди и електрични тротинети.

„Како резултат на овие засилени контроли во месец јуни оваа година на подрачје на Струмица се санкционирани 66 возачи кои не користеле кацига, а во месец јуни 2023 година бројот на санкционирани возачи кои не носеле кацига бил 45“ – додаде Трајанова.