Пожар во коритото на Крива Река во Дабиље, запален отпад и зафатена вегетацијата

Струмичката противпожарна единица денеска интервенирала на активен пожар во коритото на Крива Река во Дабиље. По пријава од граѓани, на терен излегле и општински инспектори.

„Во самото речно корито огнот имаше зафатено голем дел од растителната маса, но исто така имаше и разновиден отпад од пластика, гума, најлон и сл., каде од истиот се креваше голем, густ, црн чад. На лице место немаше затекнато присутно лице каде од страна на инспекторите би можело да послужи за водење на инспекциска постапка“, стои во информацијата од извештајот на општинскиот инспектор за животна средина која градоначалникот Костадин Костадинов ја сподели на социјалните мрежи.

Костадинов ги повика надлежните државни инспекторати да постапуваат. „Бидејќи во овој период од годината има зголемено присуство на лица кои вршат спалување на земјоделски стрништа, се повикува државниот инспекторат за земјоделие каде овој проблем е под нивна надлежност да вршат вонредни инспекциски надзори со цел да се спречи оваа појава на загадување на воздухот“, напиша тој.

Ужасна миризба синоќа ја зафати Струмица. Граѓаните реагираа со објави на социјалните мрежи, а здружението за заштита на животната средина „Здрава Котлина“ излезе со повик до надлежните институции да постапуваат.

„Синоќа Струмица беше нападната со отрови. Беше многу загадено и смрдеше на изгорена пластика и гума. Тоа го почувствувавме сите и секако не е од домовите на граѓаните!“, напишаа од здружението. Сепак, никоја институција сѐ уште не се произнела јасно од што е причинета смрдеата која струмичани ја осетија синоќа и утрово.

Градоначалникот на Струмица објави дека вонредните надзори на општинските инспектори ќе се засилат во попладневните и вечерните часови, а пожарникарите ќе го активираат дронот со термална камера за рано откривање на пожари кој го добија како донација од Европската унија.