Пожарникари – спасители од Противпожарната единица на Струмица учествуваат на меѓународна вежба во Ерменија

Осум пожарникари – спасители од Противпожарната единица на Струмица учествуваат на меѓународна вежба за справување со последици од земјотрес, која од 7 до 14 октомври се одржува во Ереван, Ерменија. Струмичките пожарникари се дел од македонскиот тим за брз одговор за пребарување и спасување од урнатини при Дирекцијата за заштита и спасување.

Вежбата се реализира преку проектот за комплексно управување со земјотрес во Јужен Кавказ, со ефективно планирање, одговор и здружени операции, финансиран од Европската унија.

Покрај Македонија, на вежбата учествуваат тимови од Црна Гора, Грција, Франција, Кипар, Грузија и домаќинот Ерменија.

Од ТППЕ Струмица упатија благодарност до градоначалникот на општина Струмица, Костадин Костадинов и Фондација „Заев – Едно општество за сите“, како и до неколку приватни општествено одговорни фирми од Струмица кои го помогнаа патувањето на тимот.

Инаку, тимот на струмичките пожарникари има големо искуство зад себе со учество на неколку меѓународни вежби и во спасување од елементарни непогоди во земјава и странство.