Министерот за земјоделство, Цветан Трипуновски заедно со Директорот на Агенција за финансиска поддршка во земјоделството и руралниот развој, Илија Стоилев ја посетија Подрачната единица при МЗШВ во Струмица, каде што од денеска се поделија над 4.500 картици за зелена нафта со вредност од над 39 милиони денари.
„Сакам да потенцирам дека оваа мерка за идната година ќе претрпи одредени измени со цел да биде поефективна мерката, а земјоделците позадоволни. Ги отвораме институциите, македонските земјоделци ќе имаат полесен пристап до Платежната агенција. Заедно со директорот сакаме да соопштиме до сите земјоделци дека во наредниот период секоја Подрачна единица и вработените во Подрачните единици на Министерството ќе имаат пристап до базата на податоци на Платежната агенција за да не мора земјоделците да патуваат до Скопје и да проверуваат дали нивната апликација е во ред“ – кажа Трипуновски.
Во наредниот период ќе се продолжи со отворање на Подрачни единици и канцеларии во речиси секоја рурална општина за да Министерството преку Подрачните единици биде сериозен сервис на самите земјоделци.
