Повеќе од 100 години струмичкото село Куклиш ја чува традицијата на борачите пеливани

Куклишани го слават денот на заштитникот на селото – Св. Атанасиј. Патронен празник на Куклиш, но и ден кога се одржува пеливанско борење, меѓу струмичани познато како „ѓуреш“, традиција долга повеќе од 100 години. Пискотот на зурли и силните удари од тапани ги најавуваа борбите меѓу пеливаните, кои буквално беа избањати со зејтин.

Ги имаше од повеќе краишта на Македонија. Само најсилните и најподготвените можеа да ги издржат борбите во борење слободен стил и да стигнат до победа, а победник е тој што ќе го натера противникот со папокот да го види сонцето, барем така велат куклишани.

Гостите и учесниците на турнирот во пеливанско борење ги поздрави градоначалникот на општина Струмица, Костадин Костадинов, кој кажа дека традицијата треба да се негува оти е наследна од предците, а куклишани остануваат верни на аманетот и го празнуваат 15 мај – денот на заштитникот на селото Св. Атанасиј.

Освен пеливанско борење овој традиционален настан беше збогатен и со настапот на играорците на КУД „Браќа Минкови“ од Куклиш.