Победник на турнирот во Градско Балдовци е екипата „ИПА Полиција“

Синоќа во Градско Балдовци, општина Струмица се одржаа финалните натпревари од првиот Илинденски турнир во мал фудбал. Оние што го започнаа турнирот на 20 јули, синоќа и го завршија со последниот натпревар – екипите на „ИПА Полиција“ и „Силабо“. Победник на овој прв турнир е „ИПА Полиција“ која со 7:3 ја победија „Силабо“. Во малото финале за третото место се натпреваруваа екипите на „Тотал Универзал“ и ФК „Дрвош“ – трето место го освои „Тотал Универзал“.

Поединечните награди на турнирот ги освоија Димче Јовов – за најдобар играч и Александар Коцев – за најдобар голман, и двајцата од победничката екипа „ИПА Полиција“. Наградите на најдобрите им ги доделија Георги Трајков, Кире Велков, Никола Трајков и Иван Крстев.

Првиот Илинденски турнир во мал фудбал имаше и хуманитарен карактер. Паричните средства кои се собираа изминатите денови на одржувањето на турнирот ќе се искористат за довршување на канбанаријата на новата Црква во селото Градско Балдовци.