ПЗУ – аптека „ЕЛИКСИР“ на светскиот ден на астмата организира едукативно предавање

Астмата претставува хронична инфламаторна болест на дишните патишта. Хроничното воспаление води до зголемена осетливост на дишните патишта која резултира со епизоди на свирење на градите, стегање во градите и губење на здивот, кашлица, особено во текот на ноќта и утринските часови.

Астмата претставува една од најчестите хронични болести во светот, со повеќе од 330 милиони заболени, 500.000 хоспитализации и повеќе од 250.000 смртни случаи годишно на светско ниво. До крајот на 2025 година се очекува бројот на заболени да надмине 450 милиони лица. Жените заболуваат за 30% повеќе во однос на мажите, додека црната раса е попогодена во однос на белата раса. Астмата најчесто се јавува кај лицата над 40 години, во земјите со низок и средно низок приход.

ПЗУ – аптека „ЕЛИКСИР“ од Струмица, како општествено одговорна здравствена установа и дел од фармацевтската дејност 31 години, го одбележува 7-ми мај, Светскиот ден на астмата. Под мотото „Превенирај, дијагностицирај, третирај, едуцирај“ организира едукативно предавање наменето за лица болни од астма на кое ќе бидат прикажани техниките за правилна употреба на терапијата за астма, а ќе бидат поделени и дневници за следење на астма и природни препарати за имунитет. Предавањето ќе се одржи на 7-ми мај во хотел Илинден, Струмица, со почеток од 17 часот, а ќе предаваат д-р Весна Певќева, специјалист по семејна медицина и магистри по фармација кои се дел од тимот на ПЗУ – аптека „ЕЛИКСИР“.