Пензионери од регионот играа и пееја на 21-та Регионална ревија во Струмица

Во Домот на АРМ во Струмица се одржа 21-та Регионална ревија на песни, музика и игри на пензионерски здруженија од регионот, во организација на Сојузот на здруженијата на пензионери на Македонија, а домаќин беше Здружението на пензионери – Струмица.

Меѓу присутните беше и градоначалникот на општина Струмица, Костадин Костадиновски кој истакна дека пензионерите се дел од нашата заедница и нашето општество кои заслужуваат должно внимание и почит од сите нас и дека Општина Струмица има одлична соработка со Здружението на пензионери во Струмица со цел создавање на поквалитетен живот на пензионерите од општина Струмица.

Претседателката на Сојузот на здруженијата на пензионери на Македонија, Станка Трајковска ги поздрави присутните, ја истакна благодарноста кон Општина Струмица за поддршката и ја прогласи ревијата за отворена на која учествуваа претставници на Здруженијата на пензионери од Штип, Пробиштип, Злетово, Свети Николе, Лозово, Радовиш, Ново Село и Струмица.

Со оваа Регионална ревија пензионерите сакаат да дадат придонес во зачувувањето на културната традиција, во негување на фолклорот, но е и можност за дружење, социјализација, подолг и поквалитетен живот на пензионерите.

Сите учесници се потрудија да презентираат квалитетни изведби, сите добија благодарници, а најдобрите ќе земат учество на Републичките средби.