Панел дискусија во Струмица: Има ли можности за Европска иднина на земјоделството во Југоистокот

Поголема информираност на фармерите за домашните и европските фондови за развој и унапредување на земјоделското производство, поголемо присуство на државните институции по руралните средини со советодавни услуги, обезбедување обртен капитал по поволни каматни стапки за земјоделците кои ќе инвестираат во агрокомплексот, презентација на успешни примери за современо и модерно земјоделско производство. Ова се дел од заклучоците од панел дискусијата на тема „Европска иднина за Југоистокот – земјоделство и улогата на заедницата“, што се одржа во Струмица во рамките на проектот „Поврзи го Југоистокот за Европска иднина“, што го имплементира Здружението на граѓани „Медија Инфонет“ од Струмица.

Панелисти беа Стевче Јорданоски од Национална Федерација на фармери на Македонија, Драги Памуков од Асоцијација на земјоделски задруги, Борче Јанев од Здружението „Проагро Фармери“ од Струмица и Перо Николов од Министерството за земјоделство, шумарство и водостопанство. Сите тие ја потенцираа потребата од поттикнување на јавниот дијалог, вмрежувањето, но и зајакнување на врската на сите чинители во агрокомплексот со медимите и образованието. Потребата се наметнува бидејќи мора да постои проток на информации, соработка и размена на искуства за искористувањето на средствата што на земјоделците им стојат на располагање за осовременување на производството.

„Има искористеност на фондовите, но секако дека може и повеќе. Треба поедноставување на постапките пред се за индивидуалните земјоделци кои не се во можност и да работат на плантажите и да терат административни и бирократски постапки за добивање грантови, како од домашните така и од ИПАРД програмата. Консултантите тука треба да играат клучна улога, но пред се, државните земјоделски институции“ – кажа Стевче Јорданоски од Националната Федерација на фармери.

Борче Јанев од „Проагро Фармери“ соопшти дека постојат консултанти на располагање и кон нив не треба да се гледа со недоверба. Тие може да помогнат во средување на цела документација, но и изработка на потребните бизнис планови за аплицирање“ – кажа Јанев.

Од Министерството за земјоделство, шумарство и водостопанство тврдат дека како миниситерство се транспарентни и контуинирано ги објавуваат информациите кога станува збор за програми кои се во интерес на земјоделците. Организираат и каравани на кои се соопштуваат условите и постапките како да се аплицира, а преку Агенцијата за поддршка на земјоделството помагаат и за правење бизнис планови или проекти за искористување на расположливите средства.

„Медиумите имаат клучна улога. Ќе мора да презентираат добри практики, приказни со современо и модернизирано прозиводство. Проблемот што информациите од наша страна не стигнуваат до сите фармери, а кај дел постои и резервираност“ – кажа Перо Николов од МЗШВ.

На овој став беше и Драги Памуков од Асоцијацијата на земјоделски задруги. „Мора да има поголема присутност на добрите практики и инвоативни решенија во аграрот во медиумскиот простор“ – кажа Памуков.

Проектот „Поврзи го Југоистокот за Европска иднина“ има за цел  да ја „приближи“ ЕУ до граѓаните од Југоистокот преку едукативни работилници и медиумски продукти поврзани со ИПАРД фондовите што ги има Европската унија за македонските земјоделци, но и мали и средни претпријатија во Југоисточниот плански регион, финансиран од ЕУ во рамките на проектот „Медиумите за ЕУ“, кој во земјава го спроведува Евротинк во партнерство со Алда и Бирц.