Отворена е Сензорна соба во новата Детска градинка „Виножито“

Во Детската градинка „Виножито“ беше ставена во функција Сензорна соба – место за индивидуална работа и правилна едукација на дечињата со потешкотии во развојот. Со ова во новата Детска градинка на секое дете со сензорен дефицит ќе му се овозможи сензорна стимулација. Ова Сензорна соба е донација од Амбасадата на Народна Република Кина во Македонија.

На денешното официјално отворање на Сензорната соба во „Виножито“ присуствуваа министерката за труд и социјална политика, Јована Тренчевска, градоначалникот на Струмица, Костадин Костадинов и донаторот, амбасадорот на Кина, Џанг Ѕуо.

„Има една поговорка во Македонија, оние кои сеат добра волја ќе жнеат и добра волја. Очекувам дека вакви „мали но убави“ проекти како сензорната соба ќе изградат уште повеќе мостови за меѓусебно разбирање и пријателство меѓу двата народи. Ја користам оваа прилика за да се заблагодарам на министерката Тренчевска, градоначалникот Костадинов и сите наставници за вложените напори за реализирање на овој проект“, кажа амбасадорот Џанг Ѕуо.

За градоначалникот Костадинов денеска е убав ден за Струмица, како што вели, имајќи ја во предвид силната соработка што како општина ја имаме со Министерството и Владата на Република Северна Македонија, но и добриот партнерски и пријателски однос којшто го имаме со Амбасадата на Народна Република Кина.

„Како општина постојано вложуваме и труд и сериозни средства во однос на подобрување на инклузијата во училиштата и на децата од предучилишна возраст и генерално сеопфатна инклузија преку најразлични социјални услуги што ги даваме како општина и секако тука не застануваме. Во конкретниот случај станува збор за донација на сензорна соба. Во општина Струмица веќе постојат три сензорни соби во основните училишта „Сандо Масев“ и „Видое Подгорец“ и навистина тоа ја пушта силната порака дека без разлика какви и да имаме разлики, како општина, општинска администрација или Совет, за нас сите се важни и битни“, кажа градоначалникот Костадинов, упатувајќи благодарност до Амбасадата на Народна Република Кина за донацијата и за придобивките од соработката со Институтот Конфуциј, а која им овозможи на струмичките деца да учат кинески јазик.

„Во доменот на сензорни соби, нашата посветеност на процесот на инклузија е очигледна и за тоа е показател внимателниот избор на опрема за сензорните соби како што се ѕидови со вода со меурчиња, тешки ќебиња и пени за терапија – секоја приспособена да одговори на различните сензорни потреби на корисниците. Овие простори не се само соби, тие се безбеден простор каде секое дете може да напредува, без оглед на нивните уникатни предизвици“, кажа министерката Тренчевска.

Сензорните соби се опремени со модерна опрема која вклучува: пластични провидни топчиња со базен, акрилно огледало, воден ѕид со меурчиња со интегрирана воздушна пумпа и извори на светлина, тешко ќебе, терапевтски пени за сензорна стимулација, LED интерактивен светлечки тепих, трамболина со прицврстен држач и слично.