Општинските инспекциски служби со вонредни инспекциски надзори на сите угостителски објекти

Градоначалникот на општина Струмица, Костадин Костадинов денеска имал состанок со општинските инспектори, преставници на Секторот за урбанизам и комунални работи и Даноченото одделение. На Општинските инспекциски служби при Општина Струмица им е наредено да извршат вонредни инспекциски надзори на сите угостителски објекти за да се проверат нивните дозволи, решенија и согласности за работа. Ова е објавено на Фејсбук страницата на градоначалникот Костадинов.

„Се договоривме за започнување на заедничка вонредна темелна контрола на сите угостителски објекти (кафулиња и дискотеки) со темелна проверка на сите дозволи, решенија и согласности коишто треба да ги имаат од општинските органи. Таму каде што ќе се утврдат неправилности, а за кои ние сме надлежни, дури и кај што немаме надлежност како Општина ќе ги известиме државните органи, ќе им дадеме рок да се поправат, доколку тоа не го направат, ќе бараме да бидат затворени“ – стои во објавата.

Донесен бил и заклучок дека ниту еден клуб за кој Министерството за економија издало согласност не одговара со намената во Секторот за урбанизам, ќе следува соодветна пријава во СВР Струмица и пазарната инспекција и кои ќе треба да одговорат како и зошто им дале лиценци за работа.

Градоначалникот на Струмица денеска имал состаноци и со директори, раководители и инспектори за преиспитување на правилниците, плановите, проценките од ризици од пожари, експлозии и други непогоди во сите училишта и градинки при што е заклучено дека најмалку еднаш месечно да се прават вежби за евакуација и секое дете и персоналот да бидат подготвени и да знаат како да се заштитат.