Општините Струмица и Кочани потпишаа Меморандум за соработка

Градоначалникот на општина Струмица, Костадин Костадинов и ВД градоначалникот на општина Кочани, Венко Крстевски, денеска потпишаа Меморандум за соработка и ги дефинираа областите во коишто ќе биде пренесено искуството и знаењето од Општина Струмица на Општина Кочани.

Двајцата градоначалници имаа работен состанок со раководителите на Сектори при Општина Струмица на кој се презентираше работата и динамиката на нивните активности, ги споделија искуствата и знаењето, се разговарше за можноста на асистенција од страна на инспекциските служби од Струмица на колегите во Кочани, помош од страна на планери, архитекти и градежни инженери.

„Тоа беа темите на коишто ставивме фокус, а го споделивме и моментот со наредбата издадена од моја страна од 21.03.2025 година за што веќе се водат постапки кон 24 правни лица најголем дел угостители, еве и јавно изразувам благодарност кон оние угостители коишто сами постапуваат и нема да има казни кон нив и нема да има пријава до државниот пазарен инспекторат, но за одредени угостителски објекти веќе е известен овој инспекторат и се спремаат решенијата за ништовност на одобренијата за користење на јавна површина, ги запазуваме законските рокови и се подготвуваме за рушење најкасно до средината на месец јуни. Од трагедијата во Кочани неможе само да тажиме и жалиме, туку треба и да научиме нешто“, кажа градоначалникот Костадинов.

Градоначалникот на Кочани, Венко Крстевски се заблагодари за подадената рака до градоначалникот Костадин Костадинов, општина Струмица, струмичкиот народ и до сите луѓе во државата коишто и помогнаа на општина Кочани во овие тешки времиња.

„Ситуацијата е таква што ни треба и институционална помош, помошта од граѓаните ја добиваме секојдневно, но нас ни фали и помош од институциите. Нашата општина во рамките на самата институција е сардисана во делот на инспекциски служби и подадената рака за градежни инспектори ја прифаќаме и сакаме истите позитивни пракси да ги примениме од општина Струмица и како што кажа градоначалникот на Струмица од оваа несреќа треба да извлечеме поука, а поуката е дека јавната површина е јавен интерес и нема да имаме никаква толеранција спрема угостителски објекти коишто го узурпираат јавниот интерес и се безбедносен проблем. Со потпишувањето на Меморандумот ќе имаме логистичка помош, ќе имаме насоки од страна на општина Струмица во делот на нивното позитивно искуство и се надевам дека истото ќе го примениме во Кочани и ќе успееме да постигнеме резултати коишто ќе бидат во интерес на народот. Би сакал да апелирам до сите државни институции и до сите други општини дека на Кочани му е потребна помош. Ние се соочивме со трагедија која не беше само трагедија за Кочани, тоа е трагедија за целата држава и се надевам дека и другите ќе ни понудат вакви иницијативи и Владата ќе ни излезе во пресрет за нашите потреби и барања и ќе успееме да го издигнеме Кочани кој се наоѓа во очајна состојба“, градоначалникот Крстевски.