Општина Струмица почна со селектирањето на отпад кај домаќинствата – се делеше „втора канта“

Центарот за климатски промени, со поддршка од Амбасадата на САД, а во соработка со Општина Струмица и ЈПКД „Комуналец“ го започнаа проектот „Патоказ за еко паметна општина”, чија цел е промовирање на одржливо живеење и создавање функционален систем за управување со отпад во општина Струмица.

Вработените во ЈПКД „Комуналец“ денеска делеа канти на домаќинствата во градот Струмица за селекција на отпад. На почетокот од оваа кампања опфатени се населбата „Карпош“ и сите улици на потегот од „Браќа Миладинови“ до улицата „Мито Хаџивасилев Јасмин“, како и од Булевар „Климент Охридски“ до Булевар „Маршал Тито“. Делењето втора канта за селектирање на отпад во наредниот период постепено ќе се проширува и на целата територија на општината.

„Горди сме што ја имаме Општина Струмица како наш партнер во оваа иницијатива и импресионирани сме од посветеноста и ентузијазмот што Општината и Јавното претпријатие за комунални дејности „Комуналец“ Струмица го покажаа во овој проект кои денеска заедно, освен 100 канти предвидени од проектот доделивме дополнителни 1100 канти бесплатно, тоа се вкупно 1200 опфатени домаќинства. Овој пилот проектот за селекција на пластичен отпад во домаќинствата е значајна пресвртница во грижата за животната средина. Веруваме дека оваа иницијатива ќе ги инспирира и другите општини да го следат примерот и да работат кон поодржлива иднина“ – кажа на денешната акција во Струмица, Бојана Станојевска Пецуровска, претседателка на Центарот за климатски промени, која заедно со градоначалникот Костадин Костадинов и директорот на ЈПКД „Комуналец“, Зоран Ѓоргиев го најавија стартот на овој проект.

Од ЈПК „Комуналец“ напоменуваат дека новите канти служат само за пластични шишиња (ПЕТ амбалажа) и лименки.

„Се надеваме на поголема еколошка свест кај граѓаните што е од најголема важност за успехот на овој проект кој ќе обезбеди поквалитетно управување со отпадот и пред се поздрава и почиста животна средина“, велат од струмичкото комунално претпријатие.

Проектот има за цел да ги промени и навиките на граѓаните за депонирање на отпадот и да ја подигне свеста за важноста на селекцијата на отпадот, а истовремено да ги намали трошоците за постапување со отпадот и да ги зголеми приходите од продажба на отпадна пластика.