„Зелен институт“: Општина Струмица има современ пристап во управувањето и селекцијата на отпадот

Во организација на „Зелен институт“, денеска во Струмица се одржа граѓански форум на тема: „Селекција на отпад за почиста животна средина“.

Според Лилјана Поповска од „Зелен Институт“, Општина Струмица има современ пристап во управувањето и селекцијата на отпадот и знае дека селекцијата е неизоставен дел од осовременувањето на градот, да биде чист и среден според високи еколошки стандарди.

„Слободно можеме да кажеме дека со еден микро проект се постигна макро ефект. Во трите општини од овој регион, Струмица, Ново Село и Босилово, гледаме голем напредок. Во Струмица е најголема разликата и за многу кратко време се постигна многу. Ова е разултат на волја, на разбирање и резултат од учење од други“, кажа Поповска.

Според анкетата што ја направила „Зелен Институт“ на територијата на општина Струмица, поголемиот број од граѓаните се подготвени да го селектираат отпадот и бараат услови од општината за да може тоа да го направат.

Градоначалникот Костадин Костадинов ги сподели искуствата на Општина Струмица во поглед на управувањето и селектирањето на отпад, истакнувајќи ги петте активности кои на тој план ги презедоа во последните два месеци, како и за неговата неодамнешна посета на Љубљана, во рамките на која го посетиле и Регионалниот центар за управување и селектирање на отпад.

Во општина Струмица засега 1200 домаќинства имаат можност да го селектираат отпадот. Тие неодамна добија „втора канта“ од ЈПКД „Комуналец“, кои селктираниот отпад го собираат секоја среда. За кратко време, од кога беа доставени кантите, собрани се 150 килограми пластика и 30 килограми лименки.

Од општината најавуваат дека наскоро ќе бидат поставени и 260 контејнери за селекција на пластика во колективните станбени објекти во градот Струмица, ќе бидат набавени и 20 полуподземни контејнери за мокра фракција, а во централното градско подрачје ќе бидат поставени и пластикомати.