Општина Струмица ги одбележа двата Илиндена од 1903-та и 1944-та година

Пред големиот споменик на Гоце Делчев денеска Општина Струмица го одбележа големиот двоен празник Илинден: 121-годишнината од Илинденското востание и 80-годишнината од Првото заседание на АСНОМ.

Се одржа културно-уметничка програма во која настапија млади играорци со македонски традиционални ора, а стихови за двата Илиндена кажуваа членови на рецитаторската секција при Домот за деца и млади „Благој Мучето“ од Струмица. Свежо цвеќе пред споменикот на великанот Гоце Делчев положија претставници на Општина Струмица, на Сојузот на борците, здруженија, претставници на политички партии.

За историографијата и значењето на двата Илиндена говореше Елена Магеровска Паликарова, заменик градоначалник на општина Струмица.

„Илинден 1903 и Илинден 1944 година – двата Илиндена, тоа се двете големи нешта кои го сочинуваат нашиот вековен светоглед. Тоа не прави исклучително горди, и таа гордост ја чуваме, негуваме и унапредуваме, пренесувајќи ја на помладите генерации како непроценливо наследство добиено од нашите предци, од нашите татковци, дедовци и прадедовци. Овој голем ден го славиме како Ден на Републиката. Колку тоа убаво и гордо звучи. Тоа е денот, кој со радост го носиме во нашите срца и души, голем ден кој живеел, живее и ќе живее во вековниот македонски споменар. Ден убав, ден значаен, ден на деновите – Илинден“ – кажа Магеровска Паликарова.