Општина Василево и италијанската општина Понтенуре се збратимија. Двајцата градоначалници Славе Андонов и Манола Групи денеска во зградата на општината Понтенуре потпишаа Акт за збратимување.
„Многу едноставно сакам да ви кажам дека сме среќни и почестени што ве имаме како наши гости, што го споделуваме со вас овој свечен момент на потпишување на Актот за збратимување, што можеме да бидеме заедно во часовите што следат, кои се разбира дека ќе бидат свечени, но подеднакво важни бидејќи ќе ни овозможат да се запознаеме и да ги поставиме основите на нашата идна соработка. Станува збор за веќе жива и плодна соработка со македонската заедница која живее во Понтенуре и во провинцијата. Многумина од нив добија италијанско државјанство, други ќе го добијат, но она што е најважно е што со текот на годините што живеат покрај нас, оваа заедница покажа восхитувачка трудољубивост, искрена подготвеност да дејствува за општото добро, големо почитување на правилата на соживот, истрајна волја за активно интегрирање во општественото ткиво, збогатувајќи го со предлози и иницијативи“ – кажа во своето обраќање градоначалничката на Понтенуре, Манола Групи на свеченоста што ја приредија за гостите од општина Василево.
За градоначалникот на општина Василево, Славе Андонов новите пријателства и воспоставени релации секогаш претставуваат нови можности за соработки и продлабочување на воспоставените комуникации. Токму ова денешно официјално збратимување со Понтенуре се темели на една таква иницијатива, од пред една година, поттикната од нашите Македонци кои живеат во Понтенуре.
„Намерата е во интерес на граѓаните од двете општини да се развие дијалог и да се зацврсти соработката. Да се разменуваат искуства и преку реализирање на заеднички активности и проекти, делувајќи во атмосфера на доверба и дух на солидарност да се придонесе за заеднички развој. Се надевам дека заедно ќе настапиме пред развојните европски фондови, кадешто треба да бидеме инвентивни при подготовка на нашите проекти. Се надевам дека ова збратимување ќе не поврзува со векови и покрај илјадниците километри што не разделуваат сепак ќе трае и ќе се одржува низ времето“ – кажа градоначалникот Андонов.
Двете општини планираат да создадат трајни и нераскинливи соработки и релации во сите области на општественото живеење, од туризам, преку култура, спорт, традиција…
Како што кажа градоначалничката на Понтенуре, „Не би сакала да летам премногу високо, но со ова збратимување би сакале да се обидеме да ставиме една тула во изградбата на Европа која ќе биде вистинска заедница на народи“.
Општина Понтенуре е мала општина, слична на општината Василево со околу 6.500 жители. Се наоѓа во провинцијата Пјаченца во италијанскиот регион Емилија-Ромања на околу 140 километри северозападно од Болоња.
