Опозицијата во Струмица реагира за непочитување на процедурата за донесување Генерален урбанистички план

Советничката група на ВМРО-ДПМНЕ и Коалицијата во Советот на општина Струмица пред 29-та седница на Советот одржа прес конференција. Опозицијата реагира за непочитување на процедурата за донесување на Генерален урбанистички план за плански период 2023-2033 година. Тие и група граѓани поднеле пријава – анкетен лист до Секторот за урбанизам на Општина Струмица.

„Имено, поради брзање за да се донесе овој Генерален урбанистички план имаме повреда на целата законска процедура и неформирање на соодветно партиципативно тело кое е од суштинско значење за целата процедура на донесување Генерален урбанистички план. Брзањето да се донесе овој Генерален урбанистички план најверојатно е поради тоа што содржи низа неправилности, како што е непочитување на приватната сопственост на граѓаните, фиктивен зелен појас и насилната урбанизација со станови во Струмица. Пријавата ни е поднесена со цел да се ревидира целата законска процедура и доколку се утврдат некои неправилности целата процедура да се стопира, да се врати назад, да се направи ревизија и да се отпочне од почеток“ – кажа Никола Маџунков, координатор на советничката група на ВМРО-ДПМНЕ и Коалицијата во Советот на општина Струмица.