Од утрово во Босилово се прави ајвер – почна Манифестацијата „АЈВЕРИЈАДА 2023“

Десеттина домаќинки од општина Босилово од утрово на училишното спортско игралиште почнаа за подготвуваат домашен ајвер како дел од првата Манифестација „АЈВЕРИЈАДА 2023“, која ја организира Општина Босилово.

Се печат црвени пиперки, се лупат, се мелат пиперките, некои домаќинки веќе почнаа да го пржат додавајќи ги сите потребни додатоци, меѓу кои и по некоја лута пиперка за да биде повкусен…

Додека домаќинките го пржат ајверот веќе на пладне ќе почне и културно забавната програма во која ќе настапат естрадните уметници Ленче Кукиќ, Благица Калева, Живко Динев, Бисера Гавровска, КУД „Гоце Делчев“ од Босилово и КУД „Кирил и Методиј“ од Иловица.

„Ајверијадата“ се планира да трае до 15 часот, а дотогаш ајверот ќе биде готов и ќе може да се вкуси, а освен овој топол ајвер подготвен од домаќинките, на самиот настан ќе бидат изложени за дегустирање и веќе подготвен ајвер, лутеница, малиџано и други „зимски“ вкусни јадења подготвени од познатата струмичка пиперка, а ќе има и домашно лебче, баница, земички, пенарлија и многу други пекарски производи … Повелете во Босилово…