Од Струмица започнаа „Walk and Talk“ настаните за подигнување на свеста за менталното здравје

Денеска од Струмица започнаа да се реализираат настаните „Walk and Talk“, организирани на иницијатива на Министерството за труд и социјална политика со поддршката на УНИЦЕФ, а во соработка со Институтот за добро владеење и евроатлантски перспективи, кои имаат за цел подигнување на свеста за менталното здравје кај адолесцентите и нивните семејства.

Министерката за труд и социјална политика, Јована Тренчевска и претставничката на УНИЦЕФ, Патриција Ди Џовани денеска заедно со претставници од извидниците и млади лица пешачеа по претходно смислена пешачка рута во Струмица.

Министерката Тренчевска вели дека темата ментално здравје треба да биде доста актуелна кај младите, затоа министерството се вклучува во настани кои ќе ја поттикнат свеста за менталното здравје.

„Системот за социјална заштита е оној кој треба да се грижи за благосостојбата, но и оној кој охрабрува, поттикнува и мотивира. Затоа сме тука денес. Зошто младите го менуваат нашето општество, дестигматизираат и исчекоруваат. Нашата крајна цел е креирање на позитивна благосостојба низ која можеме да го достигнеме нашиот целосен потенцијал“, кажа Тренчевска.

„Многу деца и млади страдаат сами и не бараат помош поради стигма или отсуство на иницијативи за унапредување и заштита на менталното здравје и грижа за оние на кои им е најпотребна. Никој не треба да биде оставен сам да се справува со предизвиците околу менталното здравје. Треба да се погрижиме децата и младите да добијат поддршка кога тоа им е потребно“, кажа Патриција Ди Џовани од УНИЦЕФ.

Иницијативата ќе има 16 настани во различни градови низ Македонија кои имаат за цел да ги поттикнат младите на возраст од 15 до 29 години отворено да зборуваат за предизвиците на менталното здравје и да го дестигматизираат менталното здравје воопшто преку пристап заснован на игра.