Од денеска до 15 август по 62-ри пат ќе се одржува Меѓународната Струмичка ликовна колонија

Од денеска до 15 август, Струмица по 62-ри пат ќе биде домаќин на 17 ликовни уметници, двајца мозаичари, еден скулптор кои доаѓаат од Србија, Црна Гора, Бугарија, Монголија и од некоклу градови од Македонија. Почнува Меѓународната Струмичка ликовна колонија, отворањето е вечерва во 20:00 часот со самостојната изложба на ликовниот уметник Томе Даневски – „Глаголички Откровенија“.

Седумнаесетте уметници во наредните десет дена ќе создаваат нови дела, со кои ќе го збогатат фондот од над 2850 уметнички дела создадени од над 1600 уметници во изминатите 61 година.

Во рамките на колонијата по 35-ти пат ќе се одржи и Мозаичка работилница, основана од академик Газанфер Бајрам и е единствена во Македонија каде се негува оваа најстара сликарска техника и дициплина – мозаикот.

Новите дела од годинашното издание на Струмичката ликовна колонија традиционално ќе бидат претставени на изложба на 11-ти септември, денот на ослободувањето на градот Струмица.

Меѓународната Струмичка ликовна колонија е најстарата и најпозната на Балканот и поширокиот регион, која се одржува секоја година во месец август. Неа во далечната 1963 година ја создале Кочо Урдин и Љупчо Апостолов, а во првите години се одржуваше во Работничкиот Универзитет во Струмица. Денес организатор и домаќин на ликовната колонија е НУ Центар за култура „Антон Панов“.