Одбојкарот Владо Милев – најдобар спортист на општина Струмица за 2023 година

На вечерашната традиционална манифестација „Избор на спортист на годината“ на општина Струмица за 2023 година, што се одржа во хотелот „Сириус“, одбојкарскиот репрезентативец Владо Милев од ОК „Струмица 47&72“ е избран за најдобар спортист на годината. Тој континуирано последните години го добива епитетот најдобар репрезент на градот.

Од струмичкиот одбојкарски клуб „Струмица 47&72“ и наградата за најдобра екипа, а тренерот на овој клуб, Кире Ричлиев е прогласен за најдобар тренер.

„Струмица отсекогаш била спортски град и еден од најголемите македонски спортски центри. Таквиот епитет го има и денес, а ќе го носи и во иднина. Ова би бил заклучокот извлечен од моите импресии од вечерашниот „Избор на спортист на годината“ за 2023 година. Со малку видоизменет формат од претходните изданија, но со зачувана суштина, изборот помина во исклучително позитивна атмосфера, исполнета со задоволство од спортските достигнувања во годината зад нас, но и со нагласен оптимизам за нови амбиции и успеси во тековната година“, објави градоначалникот Костадин Костадинов, кој најави дека за оваа 2024 година во програмата за спорт се предвидени преку 20 милиони денари од општинскиот буџет за спортските клубови кои функционираат на територијата на општина Струмица.