![almak](https://strumicanet.com/wp-content/uploads/2025/08/srnet-banner-sofa-bed-garnituri-2025-1-optimized.jpg")
Македонскиот одбојкарски репрезентативец од ОК „Струмица Никоб“, Владо Милев е избран за спортист на годината на општина Струмица за 2022 година. Наградата му ја врачи градоначалникот Костадин Костадинов на вечерашната традиционална Манифестација што се одржа во хотелот „Сириус“ во Струмица.
Одбојкарскиот клуб „Струмица Никоб“ е прогласен за најдобра спортска екипа во сениорска конкуренција во екипен спорт. За најдобар спортист во млади категории во екипен спорт е прогласена Теона Галабовска од ЖФК „Тиверија“, а првото место во оваа категорија го делат ОК „Наковски Волеј“ – младинки и ЖФК „Тиверија“ – кадетки.
За најдобар тренер во сениорска конкуренција екипен спорт беше прогласен Кирил Ричлиев од ОК „Струмица Никоб“ , а во млади категории за најдобра беше прогласена Теодора Димоска од ЖФК „Тиверија“.
Во категоријата најдобар спортист во индивидуалниот спорт првите места ги делат Славе Делиовски од КБК „Тим Зоран“ и Елена Биџева од ШКК „Шихан“, а во млади категории најдобар е Александар Делиовски од КБК „Тим Зоран“. Најдобар тренер во индивидуалниот спорт е Зоран Спасов од КБК „Тим Зоран“, а во масовниот спорт екипно првото место му припадна на СОУ „Јане Сандански“ и поединечно на Борис Секулов.
Покрај прогласувањето на најдобрите и најуспешни спортски екипи, тренери и спортисти на Струмица, беа доделени плакети на спортски клубови кои во 2022 година прославуваа годишни јубилеи, на спортисти кои постигнаа значителен успех во масовниот спорт и поединци кои дале континуирана поддршка на струмичкиот спорт.
