Одбележан 67-от роденден на загинатиот претседател Борис Трајковски

Струмица ја одбележа 67-та година од раѓањето на трагично загинатиот претседател на Република Македонија, Борис Трајковски.

Споменикот „Македонија“ поставен во струмичкиот парк во чест на Трајковски беше местото кое го посетија голем број струмичани, положија свежо цвеќе и се потсетија за животот и делото на претседателот, но и нивниот роднина, пријател и сограѓанин.

Во чест на претседателот Борис Трајковски цвеќе положија и членови на семејството Трајковски, претставници на локалната самоуправа, политички партии и претставници на институции и здруженија.

За претседателот Борис Трајковски говореше Зоран Костадинов, член на Советот на општина Струмица.

„Ретки се тие луѓе кои останале да живеат меѓу луѓето и тогаш кога физички не се меѓу нив. Борис беше човек кој неизмерно ги сакаше луѓето, Божје чедо кое го сакаше Севишниот Господ Бог, сопруг и татко кој неизмерно ги љубеше своите Вилма, Сара и Стефан, струмичанец кој си ја сакаше својата родна Струмица и Македонец кој ја сакаше Македонија, кој се гордееше со Македонија и кој веруваше во Македонија. Него го красеше човечноста и едноставноста, таков беше, таков и остана се до заминувањето од овој свет. За него и граѓаните и селаните и земјоделците и работниците и државниците и кралевите беа подеднакво исти луѓе и кон сите негуваше почит и внимание, беше тоа негова доблест по која уште долго ќе го паметиме“ – кажа советникот Костадинов.

Пред споменикот на претседателот Борис Трајковски беа прочитани и наградените творби по распишаниот литерaтурен конкурс во организација на Библиотеката „Благој Јанков Мучето” од Струмица.