Со Панихида на гробиштата и полагање цвеќе пред споменикот во малиот парк беше одбележана 74-годишнината од свирепото убиство на петте струмички студенти
Седумдесет и четири години од свирепото убиство на петте струмички студенти, Борис Белев, Мирко Пецев, Ѓорѓи Костуранов, Стево Топчев и Ѓорѓи Јармов од комунистичкиот режим, беа одбележани утринава со Панихида на струмичките градски гробишта, а пред Споменикот во малиот градски парк беше положено свежо цвеќе од членови на семејствата на убиените студенти, Советот на општина Струмица, Советот на општина Радовиш, Општинскиот Сојуз на борците и нивни поддржувачи од Струмица, политичките партии СДСМ, ВМРО-ДПМНЕ и ЗНАМ, здруженија на граѓани од регионот кои ги почитуваат делата на струмичките студенти. Рецитатори од Домот за деца и млади „Благој Мучето“ од Струмица читаа поетски колаж.
За животот и делото на петте студенти говореше Никола Андонов, претседател на Здружението на политички затвореници.
„Кога се зборува за струмичката студентска петорка пожелно е да се каже во кое време тие делуваа. Кои биле нивните визии, желби, идеи и изградена свест за македонска националност, самобитност и припадност. По завршување на Втората светска војна овие нивни напредни идеи и политички ставови ги принудиле како студенти да се вклучат во првите редови за изразување на незадоволството од таквата идеологија и политика на комунизмот“ – кажа Андонов, потенцирајќи дека нивната визија и цел и нашата, заедно ќе ја преточиме во традиција и ќе помагаме и залагаме за правна, демократска со економски просперитетна, независна и суверена македонска држава, членка на Европската унија.
