ОБСЕ сакаше да им ги презентира на градоначалниците од Југоистокот позитивните практики од постоењето на Локален Совет за превенција, но не дојдоа

Претставници од Мисијата на ОБСЕ во Македонија вчера беа во посета на Струмица. Покрај работните средби на амбасадорот Килијан Вал со градоначалникот Костадинов, претставници на институции и невладини организации, ОБСЕ заедно со СВР Струмица организираше и работен состанок на тема „Формирање и одржување на Локален совет за превенција“ на кој беа поканети сите десет градоначалници од Југоисточниот регион. Сакаа на градоначалниците да им ги презентираат позитивните практики и функционирањето на оваа неформално тело, но не дојдоа. Освен домаќинот, градоначалникот на општина Струмица, Костадин Костадинов, градоначалникот на општина Богданци, Блаже Шапов и претставник на општината Валандово, на работниот состанок повеќето градоначалници ги немаше.

„Од денешната состојба на присутни може да видиме колкав е интересот или колкава е свесноста за постоењето на ваква алка каква што е Локалниот Совет за превенција“, кажа во своето обраќање претставникот на Мисијата на ОБСЕ во Македонија, Алексеј за неприсуството на градоначалниците од регионот.

Тој говореше за важноста од потребата на локални совети за превенција во секоја општина или барем во поголемите општини во државата. Како позитивен пример ја посочи Општина Струмица и функционирањето на нејзиниот Локален Совет за превенција, кој во изминатата година разреши многу горливи проблеми во градот Струмица.

„Благодарение на овој Совет ги решивме дивите продавачи на земјоделски производи и текстил коишто беа распослани долж булеварите, околу пазарот „Чешел“, а со силна и заедничка одлука на сите партнери во Советот го формиравме и првиот стационар „Лана“ и системски го решаваме проблемот со бездомните кучиња. Продолжуваме со нови предизвици како што се вандализмот врз урбаната опрема и ченчерите. Советите се многу важни, особено по негативните примери од соседство, а кои не сакаме да се повторат кај нив, ниту да се случат кај нас. Колку повеќе дискутираме и отвораме дијалог за проблемите коишто ги имаме и им погледнеме во очи, толку побрзо и ќе најдеме решение, а решение има само доколку сите надлежни институции функционираат како едно, а токму тоа и го правиме во нашиот Совет за превенција“ – кажа во своето обраќање градоначалникот Костадин Костадинов.