Градоначалникот на општина Струмица, Петар Јанков, денеска го именува Кире Синдраковски за ВД директор на ЈПКД „Комуналец“ Струмица. Синдраковски, кој е активен член на Советот на општината од редовите на ВМРО-ДПМНЕ, доаѓа на местото на Љупче Љачев, кој беше разрешен вчера по неполни две години на оваа функција.
Новиот прв човек на „Комуналец“ е роден во 1978 година и е дипломиран машински инженер. Кариерата ја започнува во компаниите „Далвина“ и „Агролозар“, каде работи на раководни позиции, а последните осум години беше активен во приватниот бизнис.
Со ова назначување, општината најавува нова динамика во работењето на јавното претпријатие, додека јавноста очекува како новото раководство ќе се справи со тековните комунални предизвици во градот.
