Градоначалникот на општина Струмица, Костадин Костадинов со новогодишно обраќање до своите сограѓани пред доаѓањето на Новата 2024 година.
Драги и почитувани мои сограѓани,
Во минатогодишното обраќање кон вас се осврнав на магијата на мигот и новогодишната ноќ, на еуфоријата на празнувањето, меѓутоа, оваа година што помина ме направи поискусен и помудар и сакам, од самиот почеток, низ наративот на моето обраќање кон вас, да провејува една поесенцијална и подлабока нишка и да ве потсетам дека таа магија треба да ја живеете секој ден. Сакам да ве потсетам дека животот не е цел, животот не е вчера или утре, животот е денес и овде, дека целиот живот е всушност само една низа од сегашни моменти.
Наскоро тоа денес ќе биде денот и ноќта кога преминуваме од една во друга година, а најчесто е само еден обичен ден. Треба сами да решиме чудото на новогодишната ноќ, насмевките, среќата, искрените честитки што дарежливо и без калкулации ги даваме во тие моменти, понесени од неоптовареноста на животот, да ги даваме во текот на целата година и да научиме да ги подаруваме и како утеха.
За да можеме да дадеме некому нешто, мора прво да го најдеме во себе: да погледнеме во себе, да го исчистиме товарот од нашите души, да решиме да го живееме животот како да е чудо – со љубов, кроткост, милосрдие, послушност и трудољубивост за да можеме истото да го сториме и за другите.
Преку одблесокот на новогодишните светилки и празничното расположение, најпрво да се осветлиме самите себеси и да направиме место за таа светлина трајно да се насели во нашите срца и да биде водилка за секој знаен или незнаен што ќе ја загуби попатно. Да гледаме со очите на дете, да чувствуваме со срцето на детето што никогаш не престанало да живее во секој од нас. Да не ни треба посебен повод да се сакаме, да си помагаме или да се радуваме едни на други. Животот и здравјето сами по себе да станат честитка и да се стремиме сите заедно да ги оствариме – како сограѓани и како луѓе пред сѐ. Да делуваме сплотено и зеднички, како и досега, да продолжиме да ја градиме иднината на нашата општина за да може еден ден сите, со радост во срцето, да се сеќаваме на сѐ што ќе сториме во текот на годината што доаѓa.
Животот е битка сам по себе, да не го правиме и битка со луѓето околу себе. Да бидеме сѐ помалку суетни и сѐ повеќе смирени, затоа што смирениот не познава злоба, нетрпеливост, завист или омраза. Никогаш ништо не се постигнало со непријателство или зло, па затоа со почит, услужливост, кроткост, мирољубивост и љубезност да создаваме љубов и да дозволиме раѓање на великодушноста во нас и умножување на истата околу нас.
Ниедна световна сила не е поживотворна или поразорна од силата на човековата мисла и делување, па затоа оваа година користете ја мудро и со благородни побуди. Бидете причина за нечија насмевка, бидете причина за некој да си ја поврати вербата во животот и луѓето. Посакајте им на луѓето околу вас тоа што си го посакувате и себеси. Истото ви го посакувам и јас вам, од длабочината на моето срце.
Едни без други сме ништо, заедно сме сѐ.
Среќна Нова 2024 година и благословени Божиќни празници.
Костадин Костадинов, градоначалник на општина Струмица
