Дваесеттина уметници од земјата и странство го завршија своето творештво на јубилејното 60-то издание на Меѓународната Струмичка ликовна колонија. Во изминатите десет дена тие создадоа 40-тина нови дела кои ќе бидат додадени во фондот од над 2800 уметнички дела создадени во изминатите 59 години од над 1600 уметници од целиот свет.
Новите дела на 20-те уметници од Романија, Турција, Србија, Црна Гора, Бугарија и Македонија за прв пат ќе бидат претставени на 11-ти септември со традиционалната изложба што се организира по повод денот на ослободувањето на градот Струмица.
Струмичката ликовна колонија е создадена во далечната 1963 година од Кочо Урдин и Љупчо Апостолов. Тогаш како изложба на нови дела испратени од самите автори и биле претставени во Работничкиот Универзитет „Јоска Свештарот“ во Струмица, да веќе од следната година почнале да доаѓаат ликовни уметници кои своите дела ги создавале токму во Струмица и ѝ ги оставаа на градот Струмица.
Освен 60-годишниот јубилеј, годинава Струмичката ликовна колонија беше во знакот на уште еден јубилеј – 30 години од основањето на Студиото за современ мозаик која во рамките на Струмичката ликовна колонија ја основа академик Газанфер Бајрам. Единствено место во Македонија каде се негува оваа најстара сликарска техника и дициплина – мозаикот, е токму на ликовната колонија во Струмица.
