Новиот состав на Советот на општина Струмица денеска во Домот на АРМ ја одржа првата конститутивна седница со која во првиот дел претседаваше д-р Анкица Ангова, како највозрасна од новоизбраните членови на неодамнешните Локални избори. На седницата беа верифицирани мандатите на 23-цата членови на Советот, по што беше избран новиот претседател на Советот. ВМРО-ДПМНЕ го предложи Никола Маџунков, а СДСМ дадоа предлог да биде Миле Гогов. Мнозинството со 14 гласа „за“ го избраа Никола Маџунков за претседател на Советот на општина Струмица, по што тој продолжи да претседава со седницата.
Новизбраниот претседател Маџунков, се заблагодари за укажаната доверба и од граѓаните и од советниците и потенцираше дека таа за него значи голема одговорност.
„Во идниот мандат ќе се трудиме Советот на општина Струмица да го доближиме што повеќе до граѓаните, да бидеме потранспарентни, подемократски, да воведеме модерни решенија во однос на дигитализација за да може граѓаните да бидат поблиску до Советот, да поставуваат прашања, да доставуваат предлози и да бараат решенија“ – кажа Маџунков.
На седницата се обрати и новоизбраниот градоначалник на општина Струмица, Петар Јанков. Тој на советниците им посака успешна, одговорна и чесна работа.
„Очекувам ова да биде Совет во кој нема да има поделби и опструкции, туку дијалог, почит и заедништво. Вие, исто и јас како градоначалник, сме избрани со иста цел, да ја направиме нашата општина подобро место за живеење. Граѓаните не очекуваат препукувања, туку резултати, не партиски бодови, туку конкретни решенија. Она што се ветуваше за време на кампањата сега треба се покаже на дело. Струмица заслужува развој, подобрување на стандардот на граѓаните, унапредување на стопанството, образованието, инфраструктурата, културата и спортот. Вашата работа мора да биде транспарентна, отворена и достапна за сите граѓани. Секој ваш потег треба да биде воден од јавниот интерес, а секоја одлука да биде донесена со целосна одговорност и отчетност. Само така ќе ја вратиме и зајакнеме довербата во локалната власт“ – им кажа на советниците, градоначалникот Петар Јанков.
На денешната конститутивна седница беа избрани и претседателите и членовите на постојните комисии на Советот на општина Струмица.
Со Комисијата за изработка на Програма за работа на Советот на општина Струмица ќе раководи, Никола Маџунков, со Комисијата за Статут и прописи, Евица Трајанова, со Комисијата за финансии, буџет и локален економски развој ќе раководи, Владимир Ристов. Претседател за Комисијата за урбанизам, комунални дејности, заштита на животната средина и природата ќе биде Јован Симевски, со комисијата за култура, образование и спорт, ќе раководи Мила Велкова, а со Комисијата за здравствена заштита, социјална заштита и заштита на децата, Миле Гогов. Лазо Манев ќе биде претседател на Комисијата за јавна безбедност, безбедност на сообраќајот и противпожарна заштита, Владимир Ристов ќе претседава и со Комисијата за општествени дејности, а Павлинка Димитрова со Комисијата за еднакви можности на жените и мажите.
На седницата покрај градоначалникот присуствуваа и претставници на верските заедници, поранешниот претседател на Советот на општина Струмица, Марјан Даскаловски со дел од поранешни советници, пратениците во македонското Собрание, Ели Панова и Жан Дрвошанов од ВМРО-ДПМНЕ, Јована Тренчевска и Борче Цветков од СДСМ, поранешните пратеници Силвана Бонева и Васил Пишев, како и директорите на јавните општински претпријатија во Струмица.
Претседателот Маџунков веќе за следната недела ја најави и втората редовна седница на Советот на општина Струмица на која меѓу главните точки ќе биде и предлогот за ребаланс на тековниот буџет на општина Струмица.
