Македонскиот поет од Струмица, Никола Маџиров беше дел од жири комисијата што ја доделува најголемата светска награда за поезија Griffin Poetry Prize.
Тричленото жири во состав: Никола Маџиров (Македонија), Грегори Скофилд (Канада) и Наташа Третвеј (САД), оваа престижна награда му ја доделија на Американецот Роџер Ривс. Тој ја доби наградата за збирката поезија „Најдобар варварин“. Наградата „Грифин“ изнесува 130.000 долари и во моментот е најголемата светска награда што се доделува за една поетска збирка. Останатите финалисти добија по 10.000 долари.
На церемонијата пред околу илјада посетители во „Корнер Хол” во Торонто, Канада веста дека добитник на наградата е Роџер Ривс, ја соопшти Никола Маџиров заедно со членката на жирито од САД, добитничката на Пулицер и американската национална лауреатка за поезија, Наташа Третвеј. Истата вечер беше соопштено и името на добитничката на наградата за животно дело за оваа година, ирско-американската поетеса Фени Хоу, која им се придружи на Томас Транстромер, Адам Загајевски, Х.М. Енценсбергер, Ко Ун, Дерек Волкот, Шејмас Хини, Аделиа Прадо, Адриен Рич.
Инаку за освојување на наградата Griffin Poetry Prize конкурираа 602 книги поезија, меѓу кои 54 преводи од 20 јазици, поднесени од 229 издавачи од 20 земји од светот.
