![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
На 117-годишнината од раѓањето на истакнатиот македонски драмски писател Антон Панов промовирана е книга насловена „Мисли и размислувања“, во која се ставени негови досега необјавени записи. Идејата за показ на јавноста на необјавените записи на Антон Панов, преку книга, е на неговиот внук Ѓорѓи Панов, а ја издаде Националната установа што го носи неговото име, Центар за култура „Антон Панов“ во Струмица со финансиска поддршка на Министерството за култура.
„Антон Панов бил човек со сенс за убавото. Тој го знаел македонскиот јазик, ги знаел изразните можности на тој јазик, и затоа со сите сили настојува неговата драма „Печалбари“ да биде изведена на македонски јазик. Замислете во 1935 година за време на Кралството на Југославија, Антон Панов ја поставува „Печалбари“ во скопскиот театар на македонски јазик и истата има доживеано 80 праизведби низ повеќе градови во тогашна Кралска Југославија. Тоа е еден потег, зафат достоен за почит“, кажа еден од промоторите на книгата и делата на Антон Панов, Иван Котев.
Говорејќи за новата книга на Антон Панов, Котев вели дека ваквите мисли и размислувања, како збиен, суштински книжевен израз, со векови наназад го имале своето место во книжевноста, блиски до афоризмот нудат можности на мал јазичен простор да се каже многу, нагласувајќи дека мислите и размислите од оваа книга се вистинско огледало на животот.
Професорката по македонски јазик и книжевност на Универзитетот „Гоце Делчев“ во Штип, д-р Ана Витанова Рингачева, преку овие размисли Антон Панов го чита како автор со судбина на птица во чие грло застанало коска.
„Размислите на Панов некако тргнале да станат афоризми или можеби биле со намера да се напишат како афоризми, меѓутоа попатно се полнеле со нови слоеви, со нови значења, и денес ги имаме во една ваква форма. Мала е оваа книга по обем, меѓутоа од книжевно-историски аспект навистина многу значања. Овие мисли и размисли на Антон Панов се всушност негова индивидуална меморија, негово сведоштво за едно време кое од денешна гледна точка оддамна требало да одболува некои детски болести. Тогаш гласно и свесно премолчените вистини излегуваат во форма на размисли коишто денес изгубиле на значење, години по нивното пишување, а Панов како афористичар во обид можел и знаел многу да каже за своето време, но очигледно, или не смогнал сили или не сакал да го направи тоа“, кажа Ана Витанова Рингачева.
На промоцијата говореше и поранешниот професор на Битолскиот Универзитет на Катедра за македонски јазик, д-р Јордан Стојановски кој даде една појасна и друга светлина на делата на Антон Панов, посебно осврнувајќи се на „Печалбари“.
Книгата е збогатена и со факсимили од ракописите на Антон Панов, како и со негови фотографии, а откривањето и користењето на овие материјали го овозможи Љубомир Ѓоревски, раководител на архивата на МАНУ.
Пред промоцијата на книгата „Мисли и размислувања“, пред бистата на Антон Панов поставена на платото пред Центарот за култура во Струмица, членови на неговото семејство, негови потомци, вработени во Центарот за култура „Антон Панов“, граѓани почитувачи на неговите дела, положија свежо цвеќе, оддавајќи му почит со едноминутно молчење.
