![almak](https://strumicanet.com/wp-content/uploads/2024/11/srnet-banner-noe-2-optimized.png")
По 7-ми пат Здружението за помош и поддршка на лица со Даун синдром „Вера“ од Струмица ќе ја организира популарната манифестација „Убави сме, свои сме“, посветена на лицата со попреченост, која им дава можност да ја пренесат пораката дека секој е убав на свој начин.
Манифестацијата ќе се одржи на 2 декември (сабота) од 19:00 часот во Центарот за култура „Антон Панов“ во Струмица на која деца и млади со попреченост во придружба на јавни личности ќе чекорат како модели на модната писта.
Дваесеттина деца и млади и исто толку нивни придружници ќе продефилираат низ модната писта, а ќе бидат облечени во модели кои за нив ги обезбедуваат бројните спонзори и пријатели на Здружението „Вера“. Програмата ќе биде збогатена и со културно-забавна програма подготвена од ученици од основните училишта.
Зад здружението „Вера” стои Анче Туфекчиева, мајка на Верче, која е девојче со Даун синдром, позната како голем активист и жена која со својата мајчинска љубов и посветеност со години наназад допринесува за рушење на табуата, но и прифаќање и разбирање на различностите.
