На струмичкиот плоштад Гоце Делчев одбележана 120-годишнината од убиството на големиот македонски револуционер

„За Гоце Делчев заборав не смее да има, а од неговите зборови – „Јас го разбирам светот како поле за културен натпревар меѓу народите“, како ние, така и сите идни Македонци, треба многу да учиме“ – кажа Елена Магеровска Паликарова, заменик градоначалник на општина Струмица на денешната свеченост по повод 120 години од убиството на македонскиот револуционер Гоце Делчев на плоштадот што го носи неговото име.

„Велат дека времето ги лекува сите рани, но ниту по еден век и две децении, таа рана наречена – Гоце Делчев се уште боли, се уште пече, се уште не кани да направиме навраќање на тој ден, на денот кој донесе ненадоместива празнина за најсветата организација, за македонското револуционерно јадро, но и за целата татковина и нејзините граѓани, возљубени во своите прастари македонски корени“ – додаде Магеровска Паликарова.

На одбележувањето со свој рецитал се претставија членови од Домот за деца и млади „Благој Јанков Мучето“ во Струмица, а свежо цвеќе пред големиот споменик на Гоце положија претставници на Советот на општина Струмица, политичките партии СДСМ и ВМРО-ДПМНЕ, претставници на здруженија на граѓани и од основни и средни училишта.

ФОТОГАЛЕРИЈА