На иницијатива на пратеникот Миле Цеков од Струмица, пратеничката група на ЗНАМ за Наша Македонија, денеска до Собранието поднесе предлог за измена на Закон за ДДВ, со кој се зголемува прагот за замјоделците за стекнување статус на ДДВ обврзник од 2 на 4 милиони денари.
Со овој предлог-закон се предлага во членот 51 на Законот за ДДВ зголемување на прагот за задолжителна регистрација за ДДВ од 2.000.000 денари на 4.000.000 денари, но исклучиво за регистрираните земјоделци – физички лица.
Предлогот на закон за дополнување на Законот за данокот на додадена вредност се заснова врз истите цели и начела врз кои е заснован Законот за данокот на додадена вредност. Целта со предложеното законско решенија се очекува да се олесни административниот товар врз малите и средни земјоделски стопанства, да се подобри нивната ликвидност и да се создаде поволна фискална рамка која ќе го поттикнува развојот на примарното земјоделско производство.
Постојната одредба во член 51 од Законот за данокот на додадена вредност предвидува праг од 2.000.000 денари годишен промет за задолжителна регистрација за ДДВ за земјоделците. Сепак, во пракса се забележува дека регистрираните земјоделци овој праг го реализираат уште во првите 4-5 месеци од годината. Ова предизвикува проблеми кај индивидуалните земјоделци кои се оптоварени со дополнителни административни обврски и дополнителни трошоци заради книговодствени услуги. Дополнително тој процес одзема време, а кој е клучен ресурс на земјоделците. Сето тоа влијае на намалување на нивната продуктивност, бидејќи тие добиваат дополнителни обврски кои одземаат време и финансии. Дел од земјоделците, откако ќе го достигнат прагот од 2.000.000 денари, вршат продажба на земјоделските продукти за готовина, со цел да не ги надминат пропишаните лимити на банкарските сметки или пак користат сметки на други лица на чие име се префрлаат парите од продажба на земјоделски продукти. На тој начин, прагот од 2.000.000 денари предизвикува раст на сивата економијата.
„Со цел да се отстрани оваа ситуација и да се обезбеди флексибилност за земјоделските стопанства, предложуваме зголемување на прагот за регистрација за ДДВ од 2.000.000 денари на 4.000.000 денари, но исклучиво за земјоделците. Оваа измена ќе овозможи повеќе време за легитимно зголемување на прометот. Земјоделците ќе имаат прираст на приходот распределен во целата година, наместо да ги достигнува своите лимити во почетокот на годината. Намалување на неопходноста за непредвидени и неформални трансакции, зголемувањето на прагот ќе ги отстрани притисоците за продажба и купување „за кеш“, што ќе ја зголеми транспарентноста и официјалното следење на економските активности. Поттикнување на развојот и модернизација на земјоделството: Повисокиот праг ќе им овозможи на земјоделците да инвестираат во развојот на своите стопанства и да ги искористат целосно пазарните можности, придонесувајќи за зголемување на конкурентноста на аграрниот сектор“ – вели пратеникот Миле Цеков, образложувајќи го предлогот.
