На денешен ден во 1934-та година е роден еден од најплодните писатели Видое Подгорец од Колешино

Пред точно 90 години на денешен, 8 јуни 1934 година во струмичкото село Колешино е роден еден од најплодните македонски писатели, патописец, поет, раскажувач и романописец за деца и возрасни – Видое Подгорец. Припадник е на втората генерација македонски писатели. Објавил голем број стихозбирки, раскази и романи.

Во родното село завршил основно училиште, а во 1950 година завршил учителска школа во Штип. Потоа, со неполни 16 години, почнал да работи како учител. Поради сиромаштијата, не бил во состојба редовно да ги следи предавањата на Скопскиот универзитет, па затоа, студирал како вонреден студент. Во 1956 година, дипломирал на Вишата педагошка школа, а во јуни 1959 година дипломирал на Филозофскиот факултет, на групата за југословенска книжевност. Најпрвин, работел како учител, а потоа како наставник и професор, па три години работел како училиштен инспектор за Штипската околија, а во 1962 година се вработил во Скопје, во „Нова Македонија“, т.е. во редакцијата „Детска радост“, како уредник на детските списанија „Другарче“ и „Наш свет“. Својот работен век го завршил како директор и главен уредник во НИК „Наша книга“. Бил член на Друштвото на писателите на Македонија од 1958 година.

Видое Подгорец започнал да пишува додека бил ученик во учителската школа во Штип, а малку подоцна, непосредната работа со децата (како учител) имала пресудно влијание за неговата определба за детската книжевност. Подгорец спаѓа во редот на најпопуларните и најплодните македонски писатели: само во првите десетина години од своето творештво, веќе објавил околу триесет книги! Неговите дела се преведувани на повеќе јазици, и тоа: српски, хрватски, словенечки, турски, албански, руски, украински, полски, чешки, словачки, бугарски итн. Тој пишувал поезија и проза за возрасни и за деца, а се занимавал и со книжевна критика и есеистика, а покрај тоа, има објавено серија патописи од неговите патувања по Блискиот Исток. Во продолжение, тој е автор на неколку телевизиски сценарија за детски игри, како и на две радио-драми за деца: „Незавршена приказна“ (заедно со Михо Атанасовски) и „Чудесно патување“. Исто така, тој е уредник на две антологии: „Гулаб на мирот“(избор на раскази за деца) и „Вртешка“ (избор на песни за деца). Во 1969 година, издавачката куќа „Наша книга“ од Скопје објави избор од делата на Подгорец во десет книги.

Во 1966 година, за романот „Белото циганче“, Подгорец добил две награди: наградата „Младо поколение“ за најдобра детска книга во Југославија, како и втората награда на конкурсот за роман на „Детска радост“. Покрај тоа, Подгорец е добитник и на следниве награди:

• „ТВ Скопје“ за најдобра книга на годината
• „Курирчек“
• „Читателска значка“ (Љубљана)
• Награда „13 ноември“
• Награда „Климент Охридски“ (1984)

Починал на 14 април 1997 година во Скопје.

Во негова чест веќе 23 години во Струмица и Колешино се одржува Меѓународната манифестација „Средби под јаворите – Видое Подгорец“, токму во периодот на неговиот роденден.