![almak](https://strumicanet.com/wp-content/uploads/2025/08/srnet-banner-аugust2025-optimized.jpg")
Струмица и СОУ „Димитар Влахов“ беа домаќини на 7-то издание на Гастромак, едукацијата за идните готвачи, хотелиери и слаткари, насловена како „Гастромак и пријателите“.
Врвни готвачки имиња од екс-ју просторите: Стево Карапанџа, Исток Легат, Жељко Невен Бремец, Томаж Возељ, Драгица Лукин, Ѓорѓе Костиќ, Вуко Митровиќ, Дон Давид, како и Уве Мишел, потпретседател на Wacs, светската организација на готвачи, беа со учениците од оваа училиште и одржаа предавања и мастер класови на идните готвачи на Струмица од угостителско-туристичката струка, кои го учат занаетот под менторство на професорката Ивана Петров Ѓорѓиева.
Преку своите инспиративни биографски приказни најголемите гастрономски асови, вистински ѕвезди во гастрономијата посочија колку е тешко, но истовремено и прекрасно да се носи бела готвачка униформа која им овозможила стекнување на знаења и искуства од целиот свет.
Учениците имаа можност да дознаат како се стигнува до Мишелин ѕвезда, како се создава угостителски бренд, од врвните готвачи ги дознаа тајните на медитеранската кујна и разликите помеѓу модерната и традиционална кујна.
„Продолжуваме работно и понатаму со пријателството и довербата, на кои им се удрени темелите уште пред неколку години“, кажа претседателката на Гастромак, Адријана Алачки истакнувајќи дека присуството на готвачката елита значи и унапредување на нашата гастрономска сцена.
Заменичката на градоначалникот на општина Струмица, Елена Магеровска Паликарова ги поздрави гостите и учениците, учесници на оваа манифестација.
„Фактите зборуваат дека Струмица е вистинска „Мека“ кога станува збор за Гастромак и готвачите од земјата, регионот, па и од целиот свет. Имено, ова е третпат Струмица да биде домаќин на „Гастромак“, откако пред тоа, вториот и третиот Интернационален гастрономски натпревар, „Гастромак 2017“ и „Гастромак 2018“ се одржаа во овој наш град. Според ова, кога би се повикале на насловот „Гастромак и пријателите“, произлегува дека еден од најголемите пријатели на Гастромак е токму Општина Струмица“, кажа Магеровска Паликарова.
На повеќе штандови во дворот на СОУ „Димитар Влахов“ беа презентирани повеќе видови храна подготвена од вредните раце на учениците, но и производи од компании со коишто соработува училиштето, а во пресрет на 16 октомври – Светскиот ден на храната.
Инаку врвните готвачки имиња и вчера беа во Струмица, ја посетија фабриката за производство на алкохолни и безалкохолни пијалоци „ГРОЗД“, каде ја „пробаа“ познатата струмичка Мастика, го видоа просецот на производство на овој наш бренд, познат низ светот, но се освежија и со сокот од круша, брендот „Струмка“, штотуку излезен од производствената лента.
