![almak](https://strumicanet.com/wp-content/uploads/2025/07/1080x206-srnet-optimized.png")
По повод светскиот Ден на културното наследство – 18 април, во „Завод и Музеј“ Струмица беа отворени вратите за бесплатно разгледување на артефактите поставени во галеријата.
Голем број ученици од основните и средните училишта, млади организирани преку „Европската куќа“ во Струмица, како и граѓани од регионот ги разгледаа и се запознаа со артефактите во постојаната поставка од неолитот до модерната виртуелна доба, како и случувањата на цивилизациските подеми и падови, но и раѓања, исчезнувања и оживувања на култури и заеднички кодови на постоењето.
Ученици ја разгледаа и постојаната поставка во спомен куќата – Турска пошта, а вработени во „Завод и Музеј“ Струмица им ги презентираа поставките и ги информираа за историјата на сето она што е пронајдено и зачувано во оваа национална институција.
Музејот е клетката и срцевината на градот од која некој можеби илјадници години подоцна врз основа на историски артефакти, одново ќе го пресоздаде битието на една прастара цивилизација.
Светскиот ден на спомениците и археолошките локалитети, прогласен од ИКОМОС, а прифатен од УНЕСКО, се одбележува во целиот свет. Секоја година темите се актуелни и се однесуваат на подигање на свеста на јавноста за значењето на светското културно наследство, заштитата, чувањето и афирмацијата на непроценливото богатство откриено преку археологијата. Годинава, фокусот е на темата „Промените на културното наследство“, која ги опфаќа прашањата за културното наследство кои се отвораат со климатските промени.
