Мртва крава во полураспадната состојба фрлена на патот кон Царевите кули

Фотографии од мртва крава во полураспадната состојба на патот кон Царевите кули над градот Струмица, објавија на Фејсбук страницата на ЈПКД „Комуналец“ Струмица. Реагирале граѓани, се ширела неподнослива реа. Лешот на животното е отстрането од патот, а местото веднаш исчистено.

Од јавното комунално претпријатие реагираат од односот на поединци кои и покрај сите акции за почиста животна средина фрлаат се и сешто на јавни и зелени површини, загадувајки ја животната средина.

„До каде оди нашата грижа за почиста животна средина? Секојдневно со граѓани и активисти работиме и се координираме како да ги исчистиме дивите депонии и го сопреме нивното создавање, некој од нашите граѓани на патот кон Цареви Кули оставил мртва, полураспадната крава. Местото под итно е исчистено, но ја прашуваме јавноста дали на овој начин се работи за да имаме почиста средина без депонии и отпад. И што треба да направиме за да се спречат ваквите појави?“ – напишаа од „Комуналец“.