Младите од општина Струмица повторно добија свое катче – отворен Младински центар

По подолга пауза младите од општина Струмица пак ќе имаат свое катче каде ќе можат да организираат едукативни активности, да ги реализираат своите идеи и иницијативи и да учествуваат во развојот на општина Струмица. Овој пат современ и функционален простор, сместен во подрумските простории на општинската зграда во кој Општина Струмица инвестираше 7.200.000 денари. Адаптиран според креативноста и желбите на младите, современо организиран, со амфитеатар, создаден со идејата дека секој млад човек може да биде креативен во вака уредениот простор.

Членовите на Локалниот Младински Совет ќе го водат овој Младински центар и ќе биде наменет за сите млади кои сакаат да бидат дел од креирањето на младинските политики на општината, центар каде ќе можат своите идеи, предлози, да ги искажат, да ги дебатираат, да доставуваат проекти, но и да му се помага на секој млад човек, здружени заедно, токму од овој нов простор.

„Како што можете да видите ние се наоѓаме во подрумските простории, најниските простории на општинската зграда. Ако се послужиме со симболиката на овој факт некој можеби ќе помисли дека младите се на самото дно, но не е така. Ние младите не размислуваме така, ние рамислуваме поинаку. Ние велиме, тоа е најцврстата платформа, темелот над кој се гради, скалите кои водат до височините, а нашиот стремеж е токму тоа“, кажа Васил Поп-Стојанов, претседател на локалниот Младински Совет на општина Струмица.

Првиот човек на општина Струмица, Костадин Костадинов кажа дека „Струмица центар на младите“, бил еден од петте најважни проекти во неговата предизборна програма, а главен столб во него Младинскиот центар.

„Во интерес на овој центар уште од првиот ден на мојот мандат се откажав од службениот автомобил што ме следуваше и истиот беше продаден, а средствата ги вложивме во преадаптирањето на неискористениот простор во сутеренот на општинската зграда“, кажа градоначалникот Костадинов на свеченото отворање на Младинскиот центар, презентирајќи ги и најважните проекти кои се реализирани во изминативе две години од неговиот избор за градоначалник на општина Струмица.

На свеченото отворање на Младинскиот центар во Струмица покрај многуте гости од политиката, образованието, културата, стопанственици, присуствуваа и поранешните градоначалници на Струмица, Зоран Заев и Коста Јаневски, директорот на Агенцијата за млади и спорт, Наумче Мојсовски, советникот за млади и младински политики на премиерот Ковачевски, Ѓорги Тасев и Митрополитот Струмички г. Наум со свештеници од Струмичката Епархија.

Младинските центри како сервис на младите се дефинирани со донесувањето на Законот за младинско учество и младински политики во јануари 2020-та година. Согласно овој закон сите општини во државата имаат обврска до крајот на 2024-та година да отворат и овозможат функционирање на Младински центар.

ФОТОГАЛЕРИЈА од отворањето на Младинскиот центар >>>