![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
Планината Беласица, богата со природни убавини, е мотив за многумина локални фотографи кои инспирацијата за своите уметнички дела ја наоѓаат овекувајќи ја токму неа, создавајќи посебна приказна. Беласица е инспирација и за младиот фотограф Валентин Малинов, родум од Старо Коњарево, древно село вгнездено во падините на оваа планина, кој во сите годишни времиња е таму, ужива и се релаксира во убавините на природата и создава нови фотографски приказни.
Има само 25 години, а веќе пет години својот фотографски објектив го фокусира на диви животни, на птици, на пејсажи. Во секоја фотографија е забележан секој детал за создавање на посебна приказна за фотографијата што ја гледате.
Валентин синоќа своите фотографии ги постави во Градската уметничка галерија на показ пред струмичката јавност. Здружението „Кадро“ од Струмица му организираше изложба со неговите фотографии. Тоа е првата негова изложба, насловена „Присутност“, а реализацијата ја поддржаа Општина Струмица и фондацијата „Елеуса“.
„Освен на Беласица, во Македонија, фотографиите се направени и во Швајцарија, најголемиот дел од животните, како што се лисиците и срните, додека фотографиите со птиците се направени овде во Македонија, покрај нашите реки. Пејсажите не се некој типичен класичен пејсаж, туку некој минимилистички стил со контури кои мене посебно ми се допаѓаат“, вели младиот фотограф Валентин Малинов.
Изложбата „Присутност“ во Градската уметничка галерија во Струмица љубителите на фотографијата, но и на природните убавини ќе можат да ја посетат во наредните десетина дена во периодот од 15:00 до 19:00 часот, а истата е од хуманитарен карактер. Донациите во поставената кутија на влезот во галеријата се наменети за акцијата „Топол оброк за сите“ на Фондацијата Елеуса.
