![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
„За неколку месеци од денеска ВМРО-ДПМНЕ ќе ја формира следната Влада. И за неколку месеци од денеска илјадници луѓе ќе имаат можност да управуваат со институциите во Македонија. Илјадници луѓе ќе ја имаат таа чест затоа што народот им ја дал довербата. И никогаш, ама баш никогаш не треба ниту еден од нив да заборави од каде извира нивниот легитимитет. Нивниот легитимитет извира од овој народ. И ако било кога имаат дилема, дали и малку треба да избегаат од таа оска на доверба од тој народ, се лажат, ќе се удават. Никогаш не смеете да избегате од оската на доверба на народот, бидејќи тој народ го дава легитимитетот, тој народ ви дава можност и тој народ потоа казнува. Не смееме да ги повториме грешките којшто изминатите три децении се случуваа на политичката сцена во Македонија, па да важи дека сите се исти, не се сите исти. Мора да покажеме дека не се сите исти“ – кажа во своето обраќање лидерот на ВМРО-ДПМНЕ, Христијан Мицкоски на вечерашната прослава 33 години од формирањето на Општинскиот комитет на ВМРО-ДПМНЕ во Струмица.
Со голем број на гости, членови и симпатизери на оваа партија прославата се одржа покрај базенот „Аквариус“, тука беа и градоначалници на Василево, Босилово и Ново Село, пратениците од струмичкиот регион, членови на Советите во општините од регионот, потпретседателот на партијата, Александар Николовски. Им се обрати и претседателот на Општинскиот комитет на ВМРО-ДПМНЕ Струмица, Жан Дрвошанов.
„Општинскиот комитет е горд на своите советници во Советот на општина Струмица кои неуморно ги застапуваа нашите политики со голем број на активности за зачувување и унапредување на нашата општина. Ние ја градевме Струмица во скромните локални мандати и во тешки економски услови. Струмица и денеска се гордее со она што сме го изградиле со она што сме го направиле“ – кажа Дрвошанов потенцирајќи дека после победата на ВМРО-ДПМНЕ на Парламентарните избори, кога и да се одржат, на следните Локални избори во 2025 година ќе направат промена на локалната власт и конечно, како што кажа Дрвошанов, ќе добијат можност да им покажат на струмичани дека ВМРО-ДПМНЕ има капацитет, има луѓе и знаење, има стратегија да ја направи Струмица подобро место за живеење за сите луѓе, не само за луѓето блиску до власта.
Немаше роденденска торта, како во изминатите роденденски прослави, но имаше разновидни колачиња, музика во живо и по официјалните обраќања следуваше коктел забавата и дружењето меѓу сопартијците и потсетувањето на 33-те години ВМРО-ДПМНЕ во Струмица.
