Мистериите на Беласица 2023 на 24 и 25 јуни

Велосипедскиот клуб „Актив” од Струмица традиционално секоја година го организира дводневниот настан „Мистериите на Беласица“, кој се одржува последниот викенд од месец јуни, а оваа 2023 година ќе биде на 24 и 25 јуни (сабота и недела).

Учесниците имаат можност да се одлучат за пешачка или за велосипедска тура.

Првиот ден сите учесници тргнуваат од подножјето на планината Беласица со зборно место на горниот дел од селото Смолари и се упатуваат кон Планинарскиот дом „Шарена чешма“, кој се наоѓа на надморска висина од 1.276 метри. Таму се подготвува вечера и мала забава. Дел од учесниците се сместуваат во планинарскиот дом, додека останатите се организираат во сопствени шатори.

Вториот ден сите учесници се упатуваат заедно кон врвот „Тумба” или „Ѕвезден врв” кои се наоѓаат на надморска висина од 1.880 метри односно 1.877 метри надморска висина. На врвовите има краток одмор со заедничко фотографирање и враќање кон планинарскиот дом „Шарена чешма“, од каде што по заедничкиот ручек следува организирано враќање на велосипедистите и планинарите до подножјето на планината Беласица во селото Смолари.