И годинава во прекрасен амбиент на природата, со сончевите зраци под падините на Беласица, помеѓу селото Смоларе и Смоларскиот водопад се одржа Фестивалот на смоларскиот костен „Костенијада 2023“.
Печени и варени смоларски костени, специјалитети од костени, топла ракија, вино и чај, македонски народни песни со познатиот естраден уметник Миле Кузмановски и традиционални ора со КУД „Јане Сандански“ од Ново Село, ракотворби создадени од ученици од основните училишта „Видое Подгорец“ од Колешино и „Мануш Турновски“ од Ново Село беа дел од годишната манифестација „Костенијада“, која општината Ново Село ја организира уште од 2010-та година.
„Нашата Беласица, и покрај сите војни и премрежја, немири и разрушувања, сé уште дава плодови за идните генерации. Ни ги даде водопадите, ни ги даде изворите, а еве и секоја есен ни ги дава надалеку познатите смоларски костени. Нашата традиција и обичаи се длабоко вкоренати во кодот на Македонецот, и тоа ни дава можност да се издигнеме над сите поделби и да се почитуваме брат со брата Македонци“ – кажа градоначалникот на општина Ново Село, Ѓорѓе Божинов, кој во целото свое обраќање и годинава повеќе говореше за Македонија како земја на храбри борци и херои, но и земја на големи предавници и душмани, за поделбите меѓу Македонците, а во корист на трети страни, но и дека Македонија ги живее најтешките години од независноста, најавувајќи дека доаѓаат денови на подобра иднина, денови кога ќе се врати сјајот на Македонија и гордоста на Македонецот.
Инаку, целта на манифестацијата е презентација на повеќе производи направени од надалеку познатиот смоларски костен, но и на други локални производи, пијалоци, рачни изработки и други кулинарски вештини и етнолошки вредности карактеристични за ова поднебје.
