![almak](https://strumicanet.com/wp-content/uploads/2024/11/srnet-banner-noe-2-optimized.png")
И селата можат да бидат центар на големи музички настани, да донесат големи музички ѕвезди, да соберат многу народ, не само од селото, туку од целиот регион. Синоќа сите патишта водеа кон Секирник во општината Босилово, каде предпразнично се одржа големиот концерт на маестро Симон Трпчески – „Македонисимо“.
Симон Трпчески, миленикот на Британската кралица, како што го најави во една прилика на „Златна Буба Мара“ Игор Џамбазов, по многуте концерти низ светот со „Македонисимо“ и лани пред Богородица во родното село на татко му, Збажди, на планината Караорман, синоќа и во родното село на мајка му, Секирник направи едно прекрасно уживање со традиционалната македонска музика, преку транскрипции направени од Панде Шахов.
Жителите на Секирник не паметат толку многу народ да дошол во нивното село на еден концерт создаден од големиот пијанист, кој одржува концерти низ големите градови низ светот со своите колеги Александар Краповски – виолина, Хидан Мамудов – кларинет, саксофон и кавал, Александар Сомов – виолончело, Влатко Нушев – удиралки, а синоќа во Секирник во изведбата на „Македонисимо“ им се придружи и струмичанецот Сашо Митев, кавалџија во „Танец“.
Изведбата на „Македонисимо“ во дворот на училиштето „Кирил и Методиј“ во Секирник за Симон Трпчески беше посебно емотивно доживување, оти овој македонски проект, по светските изведби си дојде дома, каде што се неговите корени. Таа традиционална македонска музика потекнува токму од селата, создадена со векови од македонскиот народ.
„Овој концерт беше моја дамнешна желба. Еден ваков проект кој укажува на длабоките корени на македонскиот народ, мислам дека нема поосоодветно место отколку да се свири во села, од каде се раѓа сета енергија и целото богатство. Секирник и струмичката околија имаат исклучително важно место во историјата на Македонија и буди огромни чувства кај мене и сите колеги од пректот „Македонисимо“. Овој проект ги отсликува традицијата, корените на нашата држава и нашиот народ, бидејќи имаме со што да се гордееме и да не се плашиме да го покажеме во светот“, кажа Трпчески.
Концертот во Секирник беше дел од манифестацијата „Босилово културно лето 2023“ во организација на Општина Босилово. Градоначалникот на Босилово, Ристо Манчев рече дека со вакви концерти се будаат селата и животот во нив.
„Симон Трпчески ја покажа неговата љубов кон македонската песна, неговиот однос кон своите корени, семејството, својот народ. Тој ги импресионира младите од овој регион дека со многу работа и со талент може да се постигне многу, независно кој си и од каде си“, кажа градоначалникот Манчев.
Со концертот во селото Секирник, Симон Трпчевски и официјално ја стартува балканската турнеја на „Македонисимо“ што ќе трае до октомври, а ќе ги вклучи настапите во Хрватска, Србија, Словенија, Црна Гора и Романија.
