Лидерот на ВМРО-ДПМНЕ, Христијан Мицкоски имаше средби со жители на Струмица и Банско

Лидерот на ВМРО-ДПМНЕ, Христијан Мицкоски денеска имаше средби со жители на Банско и Струмица.

„Земјоделците заслужуваат подобар третман, бидејќи тие макотрпно работат за својот род зошто тие треба да ја хранат цела Македонија. Како идна власт земјоделците ќе бидат слушнати и нивните потреби и барања ќе бидат дел од идната програма на ВМРО-ДПМНЕ. Важно е земјоделците да добиваат редовни субвенции. Важно е струмичкиот регион да добие Откупно диструбитивен центар“, кажа Мицкоски по средбата со земјоделци од Банско.

Средбите ги продолжи со пензионери во Клубот на пензионери во Струмица. По средбата кажа дека тие се чувствуваат навредени од страна на министерката за труд и социјална политика и Владата, бидејќи немале никаков слух за нив и тие се приморани своите права да ги бараат на улица. Мицкоски вели дека нивниот револт е целосно оправдан, бидејќи се изневерени.

Доцна попладнето Мицкоски се сретна и со жители од Втора урбана заедница во Струмица.

Според лидерот на ВМРО-ДПМНЕ, Христијан Мицкоски, Генералниот урбанистички план за Струмица претставува сериозен проблем за жителите на оваа урбана заедница.

„Овој криминален „Профитерски ГУП“ е штета на над 40-тина фамилии кои не можат нормално да функционираат од оваа урбана заедница. Ќе следи ревизија за сите кримимални дејства за богатења на поединци од оваа ненародна власт. ВМРО-ДПМНЕ преку советничката група во општина Струмица со сите демократски алатки ќе го оспори овој Урбанистички план“, кажа Мицкоски.

Средбите со граѓаните Мицкоски ги продолжи во малиот градски парк каде ВМРО-ДПМНЕ одржаа мал митинг на кој говореше и претседателот на Општинскиот комитет, Жан Дрвошанов, Александар Николовски, потпретседател на ВМРО-ДПМНЕ и лидерот Христијан Мицкоски, а денот Мицкоски го заврши со младите од УМС во еден угостителски објект во Струмица.