Костадинов: 11-ти Септември е празник достоен за почитување

Денеска се навршуваат 80 години од ослободувањето на Струмица. Овој голем празник за струмичани беше одбележан со пригодна свеченост која се одржа на Спомен костурницата над градот.

За историското значење на овој ден и за придобивките што тој на градот му ги донесе во изминатите 80 години, пред присутните на одбележувањето говореше градоначалникот Костадин Костадинов.

„Струмица и струмичани мора да ги повторуваат спомените од минатото кои велат дека таа слобода некој ја извојувале со непокор, со верба, со многу љубов, но и со пролеана крв. И затоа 11-ти Септември е ден кој мора да се почитува. 11-ти Септември е празник достоен за почитување. 11-ти Септември е јазол кој цврсто ги поврзува минатото, сегашноста, иднината. Секое од овие три нешта не може да постои само за себе. Овие три нешта мора да живеат како букет кој треба да го чуваме и надградуваме“ – кажа градоначалникот Костадинов.

Градоначалникот Костадинов и членови на Советот на општина Струмица со полагање свежо цвеќе им оддадоа почит на загинатите борци, а цвеќе положија и претставници на Сојузот на борците и нивни поддржувачи од Струмица, претставници на политичките партии СДСМ, ВМРО-ДПМНЕ и ЗНАМ – За наша Македонија.

Во чест на празникот, се одржа и мал револуционерен митинг од членовите на рецитаторската секција при Домот за деца и млади „Благој Мучето“.

ФОТОГАЛЕРИЈА