Костадинов: Од утре ставам ништовност и вето на секој меморандум „на таквите“ невладини организации

Градоначалникот на Струмица, Костадин Костадинов вечерва повторно реагираше на нападите упатени кон него, особено од невладини организации, поради поддршката што ја дава за трибините и јавните дебати поврзни со Законот за родова еднаквост и Законот за матична евиденција организирани од Фондацијата „Елеуса“ и Викарниот Епископ г.Јаков.

„Не ја разбирам потребата на одредени невладини организации да се занимаваат со моето човеково право на верување во Бога, не разбирам зошто истото им пречи.

Јас сум човек кој има разбирање за сите, но со сигурност не и за нив. Иако без ниту еден кажан збор, сум мета на одредени индивидуи, јас сум човек растен во духот на Христијанството и ќе простам.

После неколку пати толеранција доведен сум до степен да си ја заштитам мојата Струмица, моите струмичанки и струмичани. Побарав извинување за навредените богољубиви граѓанки и граѓани на Струмица и не го добивме, денеска повторно по ФБ статуси, по коментари сме навредувани, омаловажувани како луѓе и тоа нема да помине.

Од утре како градоначалник со целото мое законско право ставам ништовност на секој меморандум на таквите невладини организации и Вето доколку било каков допис стигне до општината од нивна страна!

Кога е Струмица во прашање нема компромиси, се работи за нашите деца, нашите внуци, станува збор за сите нас! Еднаквите можности помеѓу жените и мажите во Струмица се посилни од кога било“, објави Костадинов на својот Фејсбук профил.