Копачките на познатиот фудбалер Роберто Баџо, тркачкиот велосипед „Пинарело“ на показ пред струмичани во Градската галерија

Во Градската уметничка галерија во Струмица, Амбасадата на Италија во Македонија со поддршка на Здружението на граѓани „Кво Вадис Ад Астра“ и Општина Струмица постави изложба насловена „Предизвик: Иновациите на италијанскиот дизајн во спортот“, на која можеа да се видат ретки, легендарни и современи спортски експонати.

Оригиналните копачки на еден од најдобрите италијански и светски фудбалери, Роберто Баџо, тркачкиот велосипед Pinarello Bolide – победник на дури 16 изданија на „Tour de France“, велосипедска опрема, скии од Зимските олимписки игри во 50-тите, опрема за алпинизам, тенис, планинарење и други автентични спортски експонати од срцето на Италија, што ја откриваат врската помеѓу креативноста, технологијата и движењето беа на показ пред струмичката јавност.

Изложбата ја отвори заменик градоначалничката на општина Струмица, Елена Маѓеровска Паликарова, а присутните ги поздрави и новоименуваниот амбасадор на Италија во Македонија, Н.Е Паоло Палминтери.

Изложбата која ќе биде отворена до 2 јули е поддржана од MAECI и ADI – Италијанско здружение за индустриски дизајн.

ФОТОГАЛЕРИЈА