Во понеделник, 20 ноември од 18:00 часот во салата на Музичкото училиште „Боро Џони“ во Струмица, младата пијанистка Јулијана Јанев, ученичка во II година во ДМУЦ „Сергеј Михајлов” Штип, во класата на проф. м-р Славчо Величков ќе одржи солистички концерт со дела од Бах, Моцарт, Мошковски, Рахмањинов, Прокофјев, Шопен…
Понеделник, 20 ноември | 18:00 часот | ООМУ „Боро Џони“ Струмица
Јулијана Јанев е родена во Струмица, во 2008 година. Пијано започнува да изучува во второ одделение, во учебната 2015/16 година во општинското основно музичко училиште „Боро Џони” во Струмица, во класата на проф. Зоран Мазнејков. Од учебната 2022/23 година своето музичко образование го продолжува во ДМУЦ „Сергеј Михајлов” во Штип, во класата на проф.М-р Славчо Величков.
Активен учесник е на пијано мастеркласови под раководство на маестро Симон Трпчески (Скопје, Македонија ), проф. Хајди Елзесер (пијанист и предавач на факултетот за музика во Детмолд, Германија), проф. Александар Сердар (факултет за музичка уметност во Белград, Србија и Академијата за музика во Љубљана, Словенија), Асами Сате (врвна Јапонска пијанистка).
Уште од самиот почеток на своето музичко образование, Јулијана се истакнува со својата исклучтелна желба да ги открие тајните на пијано изведбата. Нејзината исполнителност и посветеност на работата придонесе за краток временски период да има брз развој и да постигне високи резултати.
Има реализирано 85 настапи на бројни концерти, фестивали и натпревари во Македонија и низ Европа. Досега има реализирано три пијано рецитали (солистички концерти).
Редовен учесник е на државните натпревари и на повеќе меѓународни за млади пијанисти. Досега има освоено 32 специјални први, први и втори награди, од кои 5 први награди на државни натпревари и 27 награди на меѓународни натпревари во Милано (Италија), Белград, Шабац и Врање (Србија , Приштина (Косово), Софија (Бугарија) итн… Во 2023 година Јулијана е добитник на апсолутна прва награда на меѓународниот натпревар „Сергеј Михајлов” во Штип, апсолутна прва награда на меѓународниот натпревар за камерна музика во Кавадарци, прва награда по теорија на музика на меѓународниот натпревар „Сергеј Михајлов“во Штип.
Јулијана Јанев е добитник на престижната награда „Најдобар ученик за учебната 2017/18 година“ која ја доделува ООМУ „Боро Џони“ Струмица, а во 2022 година добива Плакета и Признание за најдобар ученик во текот на целото нејзино основно музичко образование.
Јулијана досега има настапувано на сите значајни концерти кои ги организира училиштето. Од 2016-2019 е редовен учесник на ЕПТА концертите кои ги организира македонскиот огранок на Европската асоцијација на наставници по пијано, а во 2018 година е добитник на почесна диплома за најуспешна изведба на фестивалот. Исто така Јулијана има учествувано на манифестацијата „Струмица – град на културата”, „Слободна среда” на Музичката младина на Македонија, „Светски ден на пијаното” организрано од Општинското училиште „Боро Џони“ од Струмица, „Ден на пијаното – Штип 2023” организирано од ДМУЦ „Сергеј Михајлов“ од Штип во соработка со Музичката Академија при УГД Штип, концерт на млади пијанисти „Голден Пијано Таленти”.
